Fjölskyldumyndir og saga Garðshyrninga

Myndir til 1910

27 stk.
08.10.2020

Garðshorn á Þelamörk

Garðshorn á Þelamörk

Málverk Jósefs Kristjánssonar af gamla torfbænum í Garðshorni gerð eftir lýsingu Steindórs G. Pálmasonar.

Grunnmynd af gamla torfbænum í Garðshorni á Þelamörk. Steinar Frímannsson teiknaði eftir forskrift Steindórs G. Pálmasonar.

Steinunn Anna Sigurðardóttir

Steinunn Anna Sigurðardóttir

Steinunn Anna Sigurðardóttir frá Æsustöðum, móðir Pálma, Frímanns og Arnbjargar Guðmundsbarna og eiginkona Guðmundar Sigfússonar. Steinunn fæddist 1845 á Kerhóli í Sölvadal og dó 1928 í Garðshorni.

Helga og Pálmi

Brúðkaupsmynd af Helgu Sigríði Gunnarsdóttur og Pálma Guðmundssyni. Þau hófu búskap í Garðshorni vorið 1899, fyrst á móti foreldrum hans til 1904, og í Garðshorni bjuggu þau til hausts 1947. Pálmi fæddist 1876 í Hraungerði í Eyjafirði og dó á Akureyri 1947, nokkrum dögum eftir að þau Helga fluttu frá Garðshorni. Helga fæddist á Sólborgarhóli í Kræklingahlíð 1875 og dó á Akureyri 1958.

Frímann Guðmundsson

Frímann Guðmundsson

Frímann Guðmundsson sonur Steinunnar Önnu Sigurðardóttur og Guðmundar Sigfússonar. Hann bjó með Margréti Egedíu Jónsdóttur, fyrst í Garðshorni 1905-1908, á Hamri 1908-1917 og í Efstalandi í Öxnadal 1917-1926. Hann fæddist á Einarsstöðum í Kræklingahlíð 1878 og dó á Efstalandi 1926.

Arnbjörg Guðmundsdóttir

Arnbjörg Guðmundsdóttir

Arnbjörg var dóttir Steinunnar Önnu Sigurðardóttur og Guðmundar Sigfússonar. Hún giftist Valdemar Helga Guðmundssyni og bjó fyrst með honum á Efri-Rauðalæk á Þelamörk, síðan í Fremri-Kotum í Norðurárdal og síðast í Bólu í Blönduhlíð. Hún fæddist 1881 á Einarsstöðum og dó í Bólu 1938.

Helga Sigríður Gunnarsdóttir

Helga Sigríður Gunnarsdóttir

Helga var eiginkona Pálma Guðmundssonar. Þau bjuggu í Garðshorni frá 1899 til 1947 en fluttu þá til Akureyrar. Helga fæddist á Sólborgarhóli í Kræklingahlíð 1875 og dó á Akureyri 1958.

Kristján Steinstrup Jónsson

Kristján Steinstrup Jónsson

Kristján Steinstrup Jónsson giftist Jóhönnu Guðrúnu Pálmadóttur frá Garðshorni haustið 1923. Hann var þekktur í Garðshorni sem Steini á Hvannavöllum. Áður en þau giftust hafði hann verið bóndi á Auðnum og Neðri-Rauðalæk. Eftir að hann giftist Jóhönnu bjuggu þau á Laugalandi 1923-1925, í Garðshorni 1925-1927 og á Bryta 1927-1944. Þau voru síðan tvö ár í Garðshorni áður en þau fluttu til Akureyrar þar sem þau bjuggu fyrst í Hafnarstræti 86b en síðan og síðast á Hvannavöllum 4.

Kristján Steinstrup Jónsson

Kristján Steinstrup Jónsson

Kristján Steinstrup Jónsson - Steini. Hann ólst fyrst upp hjá foreldrum sínum á Laugalandi en var tökubarn á Krossastöðum eftir að faðir hans yfirgaf heimilið og flutti til Þórshafnar.

Guðmundur Frímannsson

Guðmundur Frímannsson

Guðmundur Júlíus Frímannsson, sonur Frímanns bróður Pálma afa, lærði til kennara og var kennari og skólastjóri á Hjalteyri, síðast á Akureyri.

Ásta Frímannsdóttir

Ásta Frímannsdóttir

Ásta Frímannsdóttir (1921-1996) var yngsta dóttir Frímanns Guðmundssonar og Margrétar Jónsdóttur. Ásta fæddist á Efstalandi þar sem þau Frímann og Margrét bjuggu síðustu árin áður en Frímann dó 1926. Ásta giftist austur á Húsavík og bjó þar.

Sigríður Benediktsdóttir

Sigríður Benediktsdóttir

Sigríður Benediktsdóttir (1815-1900). Hún var kölluð Stutta-Sigga, var líklega um 125 sm á hæð. Hún var föðursystir Guðmundar Sigfússonar í Garðshorni. Ýmsir hafa orðið til að skrifa um Sigríði en hún var þroskaheft og þótti sérkennileg. Hún ólst upp hjá foreldrum sínum í Flöguseli til þrítugsaldurs en var niðursetningur í Skriðuhreppi eftir það, átti víða heimili og flakkaði enn meira milli bæja. Hún fæddist 1815 í Flöguseli og dó 1900.

Gamli Garðshornsbærinn

Gamli Garðshornsbærinn

Málverk Jósefs Kristjánssonar af gamla torfbænum í Garðshorni, gert eftir lýsingu Steindórs G. Pálmasonar.

Sigurbjörg Jónsdóttir

Sigurbjörg Jónsdóttir

Sigurbjörg Jónsdóttir (1857-1934) á Laugalandi, kona Jóns Júlíusar Árnasonar ljósmyndara og þúsundþjalasmiðs. Þau voru foreldrar Margrétar konu Frímanns Guðmundssonar og Kristjáns Steinstrup eiginmanns Jóhönnu Guðrúnar Pálmadóttur.

Jón Júlíus Árnason

Jón Júlíus Árnason

Jón Júlíus Árnason giftist Sigurbjörgu dóttur Jóns Einarssonar hreppstjóra á Laugalandi á Þelamörk. Þau tóku við búinu á Laugalandi en Jón hafði meiri áhuga á að stunda smíðar og ljósmyndun, fór tvívegis til Kaupmannahafnar til að læra ljósmyndun. Hann var þjóðhagasmiður, smíðaði klukkur, gerði við orgel og margt fleira. Búskapurinn gekk illa og Jón yfirgaf konu og börn og fluttist austur á Þórshöfn. Þar bjó hann með konu, eignaðist með henni tvær dætur sem urðu báðar skammlífar.

Sigurbjörg Jónsdóttir og börn

Sigurbjörg Jónsdóttir og börn

Sigurbjörg Jónsdóttir með yngri börn sín, Árna, Guðrúnu, Kristján, Jón Franklín og Maríu.

Sigurjóna Jónsdóttir

Sigurjóna Jónsdóttir

Sigurjóna (1878-1957) var dóttir Sigurbjargar og Jóns J Árnasonar á Laugalandi. Hún var saumakona á Akureyri, ógift og barnlaus.

Árni H Jónsson á Grjótgarði

Árni H Jónsson á Grjótgarði

Árni Halldór Jónsson (1885-1963) var sonur Sigurbjargar og Jóns á Laugalandi. Árni vann við smíðar mestan hluta ævinnar, var m.a. yfirsmiður við íbúðarhúsið í Garðshorni.

Árni H Jónsson

Árni H Jónsson frá Laugalandi. Hann vann fyrir Gunnar H Kristjánsson sem rak Verslunina Eyjafjörður á Akureyri og átti Grjótgarð á Þelamörk. Árni fékk að byggja sér lítið hús á Grjótgarði og þar bjó hann seinni hluta ævinnar.

Guðrún Sigurrós Jónsdóttir

Guðrún Sigurrós Jónsdóttir

Guðrún Jónsdóttir var ein systirin frá Laugalandi. Hún giftist Tryggva Stefánssyni og bjó með honum á Gröf í Öngulsstaðahreppi.

Jón Franklín Jónsson

Jón Franklín Jónsson

Jón Franklín Jónsson (1893-1969) var sonur Sigurbjargar og Jóns á Laugalandi. Franklín starfaði sem smiður alla ævi, bjó lengst af á Laugalandi, ógiftur og barnlaus.

María Jónsdóttir

María Jónsdóttir

María Jónsdóttir (1897-1928) var yngsta barn Sigurbjargar og Jóns á Laugalandi.

Guðrún Gunnarsdóttir á Búðarhóli

Guðrún Gunnarsdóttir á Búðarhóli

Þorgerður Guðrún Gunnarsdóttir (1862-1949) á Ólafsfirði ásamt afkomendum. Guðrún var eldri systir Helgu Sigríðar í Garðshorni. Þegar faðir þeirra dó leystist heimilið upp og skömmu síðar fór Guðrún í vist sem vinnukona en hafði Helgu systur sína með sér. Fyrst voru þær á Ytri-Bægisá en síðan á nokkrum bæjum í Kræklingahlíð þangað til Helga var uppkomin.

Guðrún Gunnarsdóttir

Guðrún Gunnarsdóttir

Þorgerður Guðrún systir Helgu Sigríðar í Garðshorni ásamt óþekktri konu.

Eiríkur Stefánsson

Eiríkur Stefánsson

Eiríkur Stefánsson frá Skógum var fermingarbróðir pabba og vinur. Eiríkur var kennari á Akureyri og síðar við Langholtsskóla í Reykjavík.

Laufey Sigrún Haraldsdóttir

Laufey Sigrún Haraldsdóttir

Laufey (1907-1957) var dóttir Haraldar organista á Efri-Rauðalæk og Katrínar konu hans.

Sumardags-fyrsta kveðja frá Eiríki Stefánssyni til Frímanns í Garðshorni